2 Te^saa^lo^ni^gaa

Baulo Fiev Bun Te^saa^lo^ni^gaa Zingh Nyei Jiu-Baang
Da'nyeic Zeiv Fienx

Biux Mengh Waac

Te^saa^lo^ni^gaa Zingh nyei jiu-baang mienh corc maiv mengh baeqc Giduc aengx daaih nyei hnoi hnangv haaix nor. Jiu-baang ziouc maaih deix la'nyauv nyei sic. Maaih deix gorngv Giduc zungv daaih liuz aqv. Baulo ziouc fiev naaiv da'nyeic zeiv fienx bun Te^saa^lo^ni^gaa jiu-baang hiuv duqv hnangv naaiv nor gorngv se maiv zien. Giduc aengx daaih nyei hnoi maiv gaengh taux, zoux waaic zoux orqv nyei sic oix zuqc camv jienv faaux taux buangv soux mouc. Taux wuov zanc maaih dauh cuotv daaih gunv mienh. Ninh yaac duqv mbuox heuc “Baamz leiz-latc wuov dauh,”yaac oix caux Giduc doix-dekc.

Baulo yaac mbuox doqc naaiv zeiv fienx nyei mienh, maiv gunv buangh zuqc haaix nyungc sic, haaix nyungc kouv naanc, oix zuqc sienx wuonv. Oix zuqc zoux gong yungz maengc, yaac oix zuqc zanc-zanc zoux kuv sic.

Fienx Gorngv
1:1-2 Jiez gorn waac
1:3-12 Baulo ceng Te^saa^lo^ni^gaa Mienh
2:1-17 Giduc aengx daaih nyei jauv-louc
3:1-15 Sienx Giduc nyei mienh oix zuqc ei jienv
ninh mbuo sienx nyei jauv zoux
3:16-18 Setv mueiz waac

2 Te^saa^lo^ni^gaa 1

Jiez Gorn Waac

1 Yie, Baulo, caux Silaa * caux Ti^mo^tai fiev fienx bun Te^saa^lo^ni^gaa Zingh * nyei jiu-baang, dongh mbuo nyei Zaangc Diex Tin-Hungh caux Ziouv Yesu Giduc nyei mienh.

2 Tov mbuo nyei Zaangc Diex Tin-Hungh caux Ziouv Yesu Giduc ceix en ceix baengh orn bun meih mbuo.

Giduc Daaih Wuov Zanc,
Mienh Zuqc Siemv Zuiz

3 Zuangx gorx-youz aac, yie mbuo oix zuqc zanc-zanc weic meih mbuo laengz zingh Tin-Hungh. Hnangv naaiv laengz zingh se horpc nyei, weic zuqc meih mbuo gunv zoux gunv sienx henv jienv faaux. Meih mbuo gorqv-mienh laanh yaac hnamv laanh gunv zoux gunv camv jienv faaux. 4 Weic naaiv, yie mbuo yiem Tin-Hungh nyei zuangx jiu-baang bungx waac-maux ceng meih mbuo. Yie mbuo ceng gorngv, maiv gunv meih mbuo zuqc mienh zoux doqc, buangh zuqc kouv, meih mbuo longc noic diev yaac sienx duqv wuonv.

5 Naaiv deix yietc zungv sic bun cing Tin-Hungh baengh fim nyei siemv mienh yaac biux mengh meih mbuo puix duqv yiem Tin-Hungh nyei guoqv. Se weic naaiv norm guoqv meih mbuo ih zanc zuqc siouc kouv. 6 Tin-Hungh se baengh fim nyei. Hoic meih mbuo zuqc kuonx naanh wuov deix mienh, Tin-Hungh oix winh bun ninh mbuo zuqc kuonx naanh. 7 Ninh yaac oix bun meih mbuo buangh zuqc kuonx naanh nyei mienh caux yie mbuo lomh nzoih duqv baengh orn. Wuov zanc Ziouv Yesu caux jienv ninh maaih qaqv nyei fin-mienh yiem wuov lungh hinc cuotv, yiem hiaangx haic nyei douz gu'nyuoz. 8 Ziouv Yesu oix winh bun maiv nyiemc Tin-Hungh nyei mienh yaac maiv muangx Ziouv Yesu nyei kuv fienx wuov deix mienh zuqc dingc zuiz. 9 Ninh mbuo oix zuqc siouc zuiz, yietc liuz zuqc mietc, nqaeqv jienv Ziouv nyei nza'hmien caux ninh njang-laangc nyei domh qaqv, * 10 dongh ninh daaih wuov hnoi weic bun ninh nyei zuangx mienh, se yietc zungv sienx ninh nyei mienh, ceng ninh, taaih ninh. Meih mbuo yaac oix caux jienv ninh mbuo ceng weic zuqc meih mbuo sienx yie mbuo zoux nyei zorng-zengx waac.

11 Weic naaiv yie mbuo zanc-zanc tengx meih mbuo daux gaux tov mbuo nyei Tin-Hungh bun meih mbuo puix duqv ninh ginv daaih nyei mienh. Yaac tov ninh longc ninh nyei qaqv bun meih mbuo zoux ziangx meih mbuo maaih hnyouv zoux nyei kuv sic, caux ei meih mbuo nyei sienx fim zoux nyei gong. 12 Hnangv naaic, mbuo nyei Ziouv Yesu nyei mbuox ziouc duqv meih mbuo taaih, ninh yaac oix taaih meih mbuo. Naaiv se ziux mbuo nyei Tin-Hungh caux Ziouv Yesu Giduc nyei en.

⇑

[Remove Footnotes]