2 Saa^mu^en

Biux Mengh Waac

Da'nyeic Saa^mu^en borqv jienv Da'yietv Saa^mu^en nyei jauv-louc. Naaiv buonv sou gorngv Ndaawitv zoux hungh nyei lungh ndiev. Daauh dangh ninh yiem naamh bung gunv Yu^ndaa (da'yietv taux da'feix zaang). Nqa'haav ninh gunv gormx guoqv, liemh baqv bung I^saa^laa^en nyei guoqv (da'hmz taux nyic ziepc feix zaang.)

Sou gorngv duqv muonc nyei, Ndaawitv weic capv ninh nyei guoqv aengx liepc ninh nyei hungh weic wuonv oix zuqc caux guoqv gu'nyuoz nyei win-wangv caux ganh norm guoqv nyei mienh mborqv jaax. Ndaawitv maaih sienx fim longx haic yaac gan longx Tin-Hungh. Ninh yaac ziu duqv baeqc fingx gan longx ninh. Mv baac buatc maaih ziangh hoc ninh zoux duqv hniev bun mienh yaac baamz zuiz hlo nyei, weic douh ganh duqv longx. Nqa'haav Ziouv nyei douc waac mienh, Naatan, ziangv jienv ninh gorngv, Ndaawitv nyiemc ganh nyei zuiz yaac ei jienv Tin-Hungh siemv dingc nyei waac.

Ndaawitv nyei seix zeiv caux ninh zoux nyei sic bun I^saa^laa^en Mienh jangx haic ninh. Nqa'haav hingv guoqv zaangc buangh zuqc zeqc naanc ninh mbuo haiz aengx oix duqv dauh hungh benx Ndaawitv nyei zeiv-fun hnangv Ndaawitv nor.

Sou Gorngv
1:1-4:12 Ndaawitv gunv Yu^ndaa
5:1-24:25 Ndaawitv gunv gormx I^saa^laa^en
(1) 5:1-10:19 Jiez gorn zoux hungh nyei ziangh hoc
(2) 11:1-12:25 Ndaawitv caux Mbatc^qe^mbaa
(3) 12:26-20:26 Kuonx naanh nyei sic camv
(4) 21:1-24:25 Ndaawitv gunv nyei setv mueiz hnoi

2 Saa^mu^en 1

Saulo Guei Seix

1 Saulo guei seix mi'aqv. Nqa'haav Ndaawitv mingh daix Aa^maa^lekv Mienh nzuonx daaih, ninh yiem Sikc^laakv hitv i hnoi. 2 Taux da'faam hnoi, maaih dauh mienh yiem Saulo nyei ndopv-liuh ciangv daaih. Ninh zuqv jienv lui-houx-huv. M'nqorngv yaac hiaamx jienv nie-mbung. * Ninh daaih taux Ndaawitv nyei nza'hmien puoqv njiec ndau baaix.

3 Ndaawitv naaic ninh, “Meih yiem haaix daaih?”

Ninh dau “Yie yiem I^saa^laa^en Mienh nyei ciangv biaux cuotv daaih.”

4 Ndaawitv aengx naaic ninh, “Tov meih mbuox yie, sic hnangv haaix nor?”

Ninh dau gorngv, “Baeqc fingx yiem mborqv jaax gu'nyuoz biaux, yaac maaih mienh zuqc daix daic camv. Saulo caux ninh nyei dorn, Yo^naa^taan, yaac daic mi'aqv.”

5 Ndaawitv naaic douc fienx nyei mienh lunx mienh, “Meih hnangv haaix nor hiuv duqv Saulo caux ninh nyei dorn, Yo^naa^taan, daic?”

6 Douc fienx nyei mienh lunx mienh gorngv, “Yie jang-jang taux Gin^mbo^aa Mbong, buatc Saulo mbaapv jienv ninh nyei cang. Mborqv jaax cie caux geh maaz baeng zunc jienv ninh daaih fatv aqv. * 7 Ninh huin nzuonx mangc buatc yie ziouc qaqv heuc yie. Yie gorngv, ‘Yie yiem naaiv oc.’

8 “Ninh naaic yie, ‘Meih haaix dauh?’

“Yie dau, ‘Yie se Aa^maa^lekv Mienh.’

9 “Ninh gorngv, ‘Tov meih daaih souv yie ga'hlen daix yie daic, weic zuqc yie zuqc siang, mun haic, mv baac yie corc maiv daic.’

10 “Yie ziouc mingh souv jienv ninh nyei ga'hlen daix daic ninh weic zuqc yie hiuv dingc ninh king njiec nor, maiv haih nangh aqv. Yie ziouc muonx ninh nyei hungh ningv yaac zorqv buoz nyei jiemh dorh daaih jiu bun meih, yie nyei ziouv.”

11 Ndaawitv ziouc betv ninh nyei lui. Gan ninh wuov deix mienh yaac fih hnangv nyei zoux. 12 Ninh mbuo nzauh nyiemv, zei maiv nyanc haaix nyungc taux lungh maanz-hmuangx. Ninh mbuo hnangv naaiv nor zoux weic Saulo caux ninh nyei dorn, Yo^naa^taan, yaac weic Ziouv nyei baeqc fingx caux I^saa^laa^en Mienh nyei zeiv-fun zuqc nzuqc ndaauv daix daic.

13 Ndaawitv naaic douc fienx wuov dauh mienh lunx mienh, “Meih yiem haaix daaih?”

Ninh dau, “Yie se yiem deic-bung, ganh fingx mienh nyei dorn, se Aa^maa^lekv Mienh.”

14 Ndaawitv gorngv, “Meih weic haaix diuc maiv gamh nziex sung buoz daix Ziouv longc youh orn daaih nyei mienh?”

15 Ndaawitv ziouc heuc yietc dauh yiem wuov nyei mienh lunx mienh daaih, gorngv mbuox ninh, “Meih mingh daix ninh maah!” Ninh ziouc daix daic wuov dauh mienh. 16 Ndaawitv gorngv mbuox ninh, “Meih daix mienh nyei zuiz meih ganh oix zuqc ndaam-dorng, weic zuqc meih ganh nyei nzuih zoux zorng-zengx gorngv, ‘Yie daix Ziouv longc youh orn daaih nyei mienh.’”

Ndaawitv Weic Saulo
Caux Yo^naa^taan
Baaux Nzauh Nyiemv Nyei Nzung

17 Ndaawitv weic Saulo caux Saulo nyei dorn, Yo^naa^taan, baaux naaiv diuh nzauh nyiemv nyei nzung. 18 Ndaawitv heuc zorqv naaiv diuh nzung njaaux Yu^ndaa Mienh. Nzung * fiev jienv Yaasaa nyei Sou. Nzung gorngv, *

⇑

[Remove Footnotes]