Saauv Mienh

(Mienh Houz Sou)

Biux Mengh Waac

Saauv Mienh Sou gorngv I^saa^laa^en Mienh nyei jauv-louc, dongh ninh mbuo yiem Sinaai Mbong mingh taux Tin-Hungh laengz bun nyei deic-bung nyei dong bung maengx wuov deix feix ziepc hnyangx gu'nyuoz. Sou cuotv naaiv norm mbuox se weic zuqc Mose faaux i nzunc mienh houz. Maiv gaengh cuotv Sinaai Mbong ninh faaux nzunc. Nqa'haav leih maiv go feix ziepc hnyangx, I^saa^laa^en Mienh mingh taux Mo^apc Deic-Bung, Jor^ndaen Ndaaih nyei dong bung maengx, aengx faaux nzunc. Yiem faaux naaiv deix i nzunc mienh houz mbu'ndongx,
I^saa^laa^en Mienh mingh taux Kaa^ndetc Mbaanie, Kaa^naa^an Deic-Bung naamh bung maengx, mv baac maiv duqv bieqc Kaa^naa^an. Ninh mbuo yiem naaic ziex hnyangx liuz, nqa'haav suiv mingh taux Jor^ndaen Ndaaih dong bung maengx. Maaih deix yiem njiec wuov norm dorngx. Aengx maaih camv nyei liuc leiz jiex ndaaih bieqc Kaa^naa^an Deic-Bung.

Saauv Mienh Sou gorngv taux I^saa^laa^en Mienh yiem deic-bung-huaang buangh zuqc kuonx naanh ziouc zanc-zanc hnyouv nzauh, gamh nziex nyei. Maaih ziangh hoc ninh mbuo ngaengc Tin-Hungh yaac ngaengc Mose, dongh Tin-Hungh paaiv daaih dorh ninh mbuo wuov dauh. Sou yaac bun mienh zieqv duqv Tin-Hungh se ziepc zuoqv, kaux duqv wuonv nyei, goux ninh nyei mienh, maiv gunv I^saa^laa^en Mienh zanc-zanc maiv muangx Tin-Hungh nyei waac. Sou yaac bun mienh hiuv duqv Mose gan longx Tin-Hungh. Maaih ziangh hoc ninh maiv maaih noic mv baac corc goux longx Tin-Hungh ginv daaih nyei mienh.

Sou Gorngv
1:1-9:23 I^saa^laa^en Mienh liuc leiz cuotv Sinaai Mbong
(1) 1:1-4:49 Faaux daauh nzunc mienh houz
(2) 5:1-8:26 Ziex nyungc leiz-latc caux ziex nyungc leiz
(3) 9:1-23 Jiex Siex Maengc Zipv da'nyeic nzunc
10:1-21:35 Yiem Sinaai Mbong taux yiem Mo^apc nyei ziangh hoc
22:1-32:42 Yiem Mo^apc cuotv nyei jauv-louc
33:1-49 Nzutv zunv gorngv mienh cuotv I^yipv Deic-Bung mingh taux Mo^apc Deic-Bung nyei jauv-louc
33:50-36:13 Maiv gaengh jiex Jor^ndaen Ndaaih jaa-ndaangc njaaux
nyei waac

Saauv Mienh 1

I^saa^laa^en Mienh Faaux
Da'yietv Nzunc Mienh Houz

1 I^saa^laa^en Mienh cuotv I^yipv Deic-Bung nyei da'nyeic hnyangx, nyeic hlaax, saeng-yietv wuov hnoi, yiem Sinaai Deic-Bung-Huaang, Wuic Buangh nyei Ndopv-Liuh wuov, Ziouv gorngv mbuox Mose, 2 “Oix zuqc tengx I^saa^laa^en nyei zuangx mienh faaux mienh houz * ziux yietc fingx yietc fingx, yietc buonc yietc buonc. Yaac oix zuqc faaux yietc dauh yietc dauh m'jangc dorn nyei mbuox. 3 Meih caux Aalon oix zuqc ziux guanh guanh I^saa^laa^en
Mienh faaux mbuox, yiem hnyangx-jeiv nyic ziepc hnyangx gu'nguaaic, haih zoux duqv baeng nyei dauh dauh m'jangc dorn nyei mbuox. 4 Fingx-fingx oix zuqc maaih dauh zoux ninh mbuo nyei buonv-fingx mienh nyei bieiv zeiv daaih tengx meih mbuo.” 5 Tengx meih wuov deix mienh nyei mbuox maaih hnangv naaiv.

Fingx nyei Mbuox Fingx nyei Bieiv Zeiv
Lu^mben Fingx Se^nde^e nyei dorn, E^li^su
6 Si^me^on Fingx Sux^li^satv^ndai nyei dorn, Se^lu^mi^en
7 Yu^ndaa Fingx Am^mi^naa^ndapc nyei dorn, Naason
8 Itc^saax^kaa Fingx Zu^aa nyei dorn, Ne^tan^en
9 Se^mbu^lun Fingx Helon nyei dorn, E^li^apc
10 Yosepv nyei zeiv-fun,
E^faa^im Fingx Am^mi^hutv nyei dorn, E^li^saa^maa
Yosepv nyei zeiv-fun,
Maa^natv^se Fingx Be^ndaa^su nyei dorn, Gaa^maa^li^en
11 Mben^yaa^min Fingx Gi^nde^o^ni nyei dorn, Aa^mbi^ndan
12 Ndaan Fingx Am^mi^qatv^ndai nyei dorn, Aa^hi^ye^se
13 Aa^se Fingx Okaan nyei dorn, Baa^gi^en
14 Gaatc Fingx Nde^u^en nyei dorn, E^li^yaa^saapc
15 Napv^taa^li Fingx Enan nyei dorn, Aa^hi^laa

16 Naaiv deix mienh se zuangx mienh ginv daaih zoux fingx-fingx
I^saa^laa^en Mienh nyei bieiv zeiv, se dongh loz-hnoi ong-taaix liepc daaih nyei bungh buonc bieiv zeiv.

17 Mose caux Aalon ziouc dorh jienv dongh maaih mbuox naaiv deix mienh, 18 taux nyeic hlaax, saeng-yietv wuov hnoi, ninh mbuo heuc zuangx mienh gapv zunv ziouc ziux ong-taaix nyei bungh buonc caux mienh buonc faaux mienh houz, yaac ziux dauh dauh duqv nyic ziepc hnyangx faaux maengx nyei m'jangc dorn, yietc dauh yietc dauh nyei faaux mbuox. 19 Ziux Ziouv mbuox Mose zoux, ninh yiem Sinaai Deic-Bung-Huaang saauv mienh.

20-43 Yiem I^saa^laa^en nyei dorn-hlo, Lu^mben, nyei zeiv-fun ziux bungh buonc, ziux mienh buonc, ziux mbuox, ninh mbuo faaux dauh dauh nyic ziepc hnyangx faaux maengx, haih zoux duqv baeng nyei m'jangc dorn nyei soux mouc. Yietc zungv maaih hnangv naaiv. *

Fingx Mbu'ziex Dauh
Lu^mben Fingx maaih 46,500 dauh
Si^me^on Fingx maaih 59,300 dauh
Gaatc Fingx maaih 45,650 dauh
Yu^ndaa Fingx maaih 74,600 dauh
Itc^saax^kaa Fingx maaih 54,400 dauh
Se^mbu^lun Fingx maaih 57,400 dauh
Yosepv nyei dorn,
E^faa^im Fingx maaih 40,500 dauh
Yosepv nyei dorn,
Maa^natv^se Fingx maaih 32,200 dauh
Mben^yaa^min Fingx maaih 35,400 dauh
Ndaan Fingx maaih 62,700 dauh
Aa^se Fingx maaih 41,500 dauh
Napv^taa^li Fingx maaih 53,400 dauh
Yietc zungv maaih 603,550 dauh

44 Naaiv se Mose caux Aalon aengx caux ziepc nyeic fingx nyei ziepc nyeic dauh bieiv zeiv saauv nyei m'jangc dorn. 45 Da'faanh duqv nyic ziepc hnyangx faaux maengx, dauh dauh haih cuotv mingh mborqv jaax nyei I^saa^laa^en Mienh ziux bungh buonc saauv daaih. 46 Yietc zungv maaih juqv sinx buo cin hmz baeqv hmz ziepc dauh.

Orn Lewi Fingx Goux Laengz
Ngaengc Waac Nyei Ndopv-Liuh

47 Mv baac Lewi Fingx nyei mienh buonc maiv duqv caux wuov deix fingx saauv, 48 weic zuqc Ziouv gorngv mbuox Mose, 49 “Maiv dungx saauv Lewi Fingx. Maiv dungx bun Lewi Fingx caux wuov deix I^saa^laa^en Mienh faaux mienh houz. 50 Oix zuqc paaiv Lewi Mienh goux Laengz Ngaengc Waac nyei Ndopv-Liuh, caux ndopv-liuh nyei jaa-sic, aengx caux naaiv norm ndopv-liuh longc nyei yietc zungv ga'naaiv. Ninh mbuo oix zuqc bienh ndopv-liuh caux ndopv-liuh nyei yietc zungv jaa-sic. Yaac oix zuqc goux naaiv norm ndopv-liuh aengx corng ganh nyei ndopv-liuh huing gormx. 51 Haaix zanc suiv Laengz Ngaengc Waac nyei Ndopv-Liuh, se Lewi Mienh oix zuqc caeqv. Haaix zanc corng, Lewi Mienh oix zuqc corng. Se gorngv ga'nyiec nyei mienh mingh fatv, oix zuqc bun ninh zuqc daic aqv. * 52 I^saa^laa^en Mienh oix zuqc corng ganh nyei ndopv-liuh benx yietc guanh yietc guanh nyei, gorqv-mienh yiem gorqv-mienh nyei guanh, yiem ganh nyei fingx nyei geh ga'ndiev. 53 Mv baac Lewi Mienh oix zuqc corng ganh nyei ndopv-liuh huing jienv Laengz Ngaengc Waac nyei Ndopv-Liuh weic maiv bun I^saa^laa^en nyei zuangx mienh zuqc yie nouz. Se Lewi Mienh oix zuqc goux Laengz Ngaengc Waac nyei Ndopv-Liuh.”

54 I^saa^laa^en Mienh ziouc ei Ziouv mbuox Mose nyei waac hnangv naaiv nor zoux nzengc.

⇑

[Remove Footnotes]